តាមប្រភពព័ត៌មាន (AFP)បានឱ្យដឹងថា ប្រធានស្ថាប័ននយោបាយជាន់ខ្ពស់បំផុតរបស់លីប៊ី បានលាលែងពី តំណែងកាលពីរាត្រីថ្ងៃអង្គារ បីសប្តាហ៍បន្ទាប់ពីច្បាប់មួយត្រូវបានអនុម័ត ដោយហាមប្រាមដល់អ្នកណាដែលធ្លាប់ បម្រើការក្រោមរបបអំណាចរបស់ជនផ្តាច់ការដែលបានស្លាប់ទៅហើយ លោក មួរម៉ារ កាដាហ្វី ។
កាលពីថ្ងៃទី ៥ ខែឧសភា សភាជាតិលីប៊ី បានអនុម័តច្បាប់ចម្រូងចម្រាសមួយ ដោយហាមប្រាមក្រុមមន្ត្រីដែលធ្លាប់បម្រើការក្រោមរបបកាដាហ្វីចន្លោះថ្ងៃទី ១ កញ្ញា ឆ្នាំ ១៩៦៩ និងការដួលរលំនៃ របបរបស់លោកក្នុងខែតុលា ២០១១ មិនឱ្យមានតួនាទីណាមួយទេ ។
ទីប្រឹក្សារបស់លោកម្នាក់បានប្រាប់ឱ្យដឹង ក្នុងលក្ខខណ្ឌមិនបញ្ចោញឈ្មោះថា លោក Mohamed almegaryef បានដាក់ពាក្យសុំលាលែងរបស់លោកពីរាត្រីថ្ងៃអង្គារ នៅចំពោះមុខសភាជាតិ ។ ដោយមិនរៀបរាប់ពីហេតុផល ចំពោះការលាលែងរបស់លោក Megaryef ទីប្រឹក្សារូបនេះ បាននិយាយថា សភាជាតិ និងបោះឆ្នោតជ្រើសតាំងប្រធាន ថ្មីម្នាក់នៅក្នុងប៉ុន្មានថ្ងៃខាងមុខ ។
លោក Megaryef ធ្លាប់ជាអគ្គរដ្ឋទូតលីប៊ី ប្រចាំប្រទេសឥណ្ឌាក្នុងទសវត្សរ៍ឆ្នាំ១៩៨០ មុនពេលលោកបានផ្តាច់ខ្លួន និងបានចូលរួមជាមួយក្រុមប្រឆាំងនិរទេស ។
ដោយស្រង់សេចក្តីថ្លែងការណ៍ពីការិយាល័យលោក Megaryef ទីភ្នាក់ងារសារព័ត៌មាន Lana បាននិយាយថា រូបលោកនឹងប្រកាសលា លែងរបស់លោកក្នុងសុន្ទរកថាមួយនៅពេលក្រោយមកក្នុងរាត្រីថ្ងៃអង្គារ នោះដែរ ។
ច្បាប់ដែលចូលជាធរមានចាប់ពីថ្ងៃទី ៥ ឧសភា នេះ ត្រូវបានអនុម័តក្រោមសម្ពាធពីក្រុមប្រដាប់ អាវុធច្រើន ដោយទាមទារឱ្យមានការ បណ្តាញក្រុមអតីតមន្ត្រីនៃរបបនោះចេញពីតំណែងនយោបាយបច្ចុប្បន្ន ។ ក្រុមប្រដាប់អាវុធជាច្រើនបានឡោមព័ទ្ធក្រសួងការបរទេស និងក្រសួងយុត្តិធម៌លីប៊ី នៅក្នុងក្រុងទ្រីប៉ូលី ជាច្រើនថ្ងៃមុនពេលច្បាប់នោះត្រូវបានអនុម័ត ។
គួរបញ្ជាក់ថា លោក Megaryef ត្រូវបានតែងតាំងជាប្រធានសភាពីខែសីហា ឆ្នាំមុន បន្ទាប់ពីការបោះឆ្នោតដំបូងនៅលីប៊ីកាលពីខែមុន ។ លោក Megaryef បានរស់នៅនិរទេស ៣១ឆ្នាំ ក្នុងនោះ ២០ឆ្នាំ ក្នុងនាមជាជនភៀសខ្លួននយោបាយនៅសហរដ្ឋអាមេរិក ហើយជាមួយនឹងជនប្រឆាំងជាច្រើនទៀត លោកបានបង្កើតក្រុមប្រឆាំងមួយដែលបានព្យាយាមផ្តួលរំលំកាដាហ្វី ៕
